ကမ္ဘာပျက်ခြင်း

🇲🇲 2020 ပထမဦးဆုံးရွေးချယ်မှု 緬甸文初選 🇲🇲

📜 ကမ္ဘာပျက်ခြင်း 
👤 သက်ပိုင်စိုး

အခန်း (၁)

ထိုအရပ်သို့ ကြောက်မက်ဖွယ်ရာ ဘေးအန္တရာယ်ကပ်ဆိုးကြီး ကျရောက်လာမည့်နေ့ မနက်ခင်းသည် ပုံမှန်အတိုင်းသာ ရှိနေခဲ့သည်။ မနက်ခင်းအပူချိန်သည် ယခင်နေ့များအတိုင်း မပူလွန်း မအေးလွန်းဘဲ နွေးထွေးမှုကိုသာ ပေးနေသည်။ လေထုသည်လည်း ပုံမှန်အတိုင်းသာ ဝေ့ဝဲတိုက်ခတ်နေ၏။ မကြာခင် အချိန်တွင် သူတို့မျိုးနွယ်စုများအားလုံး သေဘေးဖြင့် ရင်ဆိုင်ကြရတော့မည်ဟု မည်သူမျှ မတွေးမိကြ။ မထင်ထားကြ။ သံသယဖြစ်ဖွယ်ရာ အရိပ်အယောင်ပင် မမြင်ခဲ့ရ။ ထို့ကြောင့်ပင် ပုံမှန်အတိုင်းသာ သွားလာလှုပ်ရှားနေကြ၏။

ကလေးများက ပြေးလွှားဆော့ကစားနေသလို သားသည်အမေများကလည်း ကလေးငယ်လေးများကို စားစရာများ ခွံ့ကျွေးနေကြသည်။ ငယ်ရွယ်နုပျိုသူများက ဆိုင်ရာလုပ်ငန်းခွင်များတွင် လှုပ်ရှားလုပ်ကိုင် နေကြ၏။ သက်ကြီးရွယ်အိုများကတော့ ပူနွေးသော နေရောင်ခြည်အောက်တွင် ငြိမ်သက်စွာဖြင့် ထိုင်နေကြလေသည်။ မောင်နီသည်လည်း မနေ့ညမှ စားလက်စကျန်နေသေးသည့် မုန့်အပိုင်းတခုကို ဇနီးနှင့်သားကို ခွဲဝေကျွေးနေခဲ့သည်။ အရာရာသည် ယခင်နေ့များအတိုင်း ပုံမုန်လည်ပါတ်နေခဲ့သည်။ ထိုကဲ့သို့ အေးချမ်းစွာ ရှာဖွေစားသောက် နေထိုင်နေကြသော သူတို့အတွက် နောက်ဆုံးအချိန်အခါသည်ကား မျှော်လင့် မထားဘဲ ကျရောက်လာခဲ့လေပြီ။

ပထမဆုံး ကောင်းကင်ထက်မှ မိုးခြိမ်းသံကဲ့သို့ အသံကျယ်ကြီး ဝေါခနဲ ထွက်လာသည့်အခါ ထိုအရပ်ဒေသတွင် ရှိနေသူအားလုံး အထိတ်တလန့်ဖြစ်ကုန်ကြသည်။ ထိုအသံကျယ်ကြီးနှင့်အတူ စူးရှတောက်ပလွန်းသော အလင်းရောင်တန်းကြီးသည် သူတို့နေထိုင်ရာ ဒေသတခုလုံးသို့ ကျရောက်လာခဲ့သည်။ မောင်နီသည် လက်ဖြင့်ကာခါ ကောင်းကင်သို့ မော့ကြည့်လိုက်သော်လည်း စူးရှလွန်းသည့် အလင်းရောင်ကြောင့် သဲသဲကွဲကွဲ မမြင်ရ။ ကောင်းကင်သည် ယခင်နေ့များအတိုင်း မဟုတ်တော့ဘဲ ပွင့်ထွက်ကာ စူးရှသောအလင်းရောင်များ ဝင်လာနေခြင်း ဖြစ်သည်။

တခြားသူများ အားလုံးလည်း ထိုအလင်းရောင်ကြီးကြောင့် လှုပ်ရှားဖို့ကို မေ့နေသည်အထိ တအံ့တသြ ဖြစ်လို့နေကြသည်။ ထို့နောက် ရုတ်တရက်ချက်ချင်းပင် သူတို့နေထိုင်ရာ အရပ်တစ်ခုလုံး အလင်းရောင်များ ကွယ်ပျောက်ကာ အမှောင်ဖုံးလွှမ်းသွားတော့၏။ သူတို့၏ ကောင်းကင်ပေါ်မှ အမျိုးအမည် မဖော်ပြနိင်စွမ်းသော ကြီးမားသည့် အရာဝတ္ထုများ ပြုတ်ကျလာသဖြင့် အမှောင်ဖုံးလွှမ်းသွားခြင်းဖြစ်သည်။ ထိုအရာဝတ္ထုများသည် သူတို့အရပ်ဒေသတခုလုံးပေါ်သို့ နေရာလပ်မကျန်အောင်ပင် ကျရောက်လာခဲ့သည်။

ထိုအရာဝတ္ထုများမှာ ကြီးမားသည့်အပြင် လေးလံလွန်းလှသဖြင့် အံ့အားသင့် မင်သက်နေမိကြသူ တော်တော်များများမှာ ပိပြားကာ အသက်ပျောက်သွားကြရတော့သည်။ တချို့မသေမရှင် ဖြစ်နေသူများ၏ ကယ်ပါယူပါ အော်ဟစ်သံများသည်လည်း ထိုဒေသတခုလုံးတွင် ဆူညံပွက်လော ရိုက်နေလေသည်။ သို့သော် မည်သူကမှ တစ်ဦးကိုတစ်ဦး ကယ်တင်ပေးဖို့ရန် မဖြစ်နိင်တော့ပေ။ မြန်ဆန်လွန်းသော အဖြစ်အပျက် အောက်တွင် ပြေးလွှားရှောင်ပုန်းချိန်မရလိုက်ဘဲ ပျောက်ဆုံးသွားကြရသည်။

မောင်နီတို့ မိသားစုလည်း စားလက်စမုန့်ကို ပစ်ချကာ အသက်ဘေးအတွက် ခြေဦးတည့်ရာ ပြေးရတော့၏။ ပြေးရင်းဖြင့် မည်သည့်အရပ်သို့ ရောက်သွားနိင်မည်ကိုပင် စဉ်းစားချိန်မရတော့။ ကောင်းကင်ထက်မှ အရာဝတ္ထုများကလည်း အဆက်မပြတ် ကျရောက်နေတုန်းပင်ဖြစ်သည်။ သူတို့နေရာတစ်ခုလုံးသည် မှောင်မိုက်ကာ နားကွဲမတတ် ဆူညံနေလေသည်။ ကျယ်ဝန်းလှသော ဤအရပ်တွင် ခြေဦးတည့်ရာ ပြေးလွှားနေကြသော ဘဝတူများစွာကိုတွေ့ရသည်မှာ သွေးပျက်ခြောက်ခြားစရာ ကောင်းလွန်းလှသည်။ မှောင်မိုက်ထဲတွင် ပြေးရင်းဖြင့် သူ့ဇနီးနှင့်သားလည်း ဘယ်ဆီဘယ်ဝယ် ရောက်သွားမှန်း မသိတော့။ သူ့မိဘများဘိုးဘွားများရော သေဆုံးသွားကြပြီလား ထွက်ပြေးလွတ်မြောက် သွားကြပြီလား မသိနိင်တော့ပြီ။

ပြေးရင်းလွှားရင်း သူ့ဇနီးနှင့်သားငယ်ကို ရှာဖွေကြည့်သော်လည်း မတွေ့ရ။ သေဆုံးသွားကြပြီလားဟု တွေးမိတော့ ပြေးနေသည့် ခြေလှမ်းများပင် အားလျော့သွားရသည်။ သူတို့ကို ရှာဖွေချင်သော်လည်း မှောင်မိုက်နေသည့်အပြင် အဆက်မပြတ်ကျရောက်နေသော အရာဝတ္ထုများကြောင့် အချိန်ယူကာ ရှာဖွေဖို့ ဆိုသည်မှာတော့ မဖြစ်နိင်ပေ။ လောလောဆယ် မိမိအသက်ဘေးအတွက် ခြေဦးတည့်ရာသို့သာ ပြေးနေ မိတော့သည်။ ကံကောင်းသည်မှာ တောင်ခြေရင်းတလျှောက် ပြေးနေတာကြောင့် ကောင်းကင်မှကျလာသည့် အရာဝတ္ထုများနှင့် တိုက်ရိုက်မထိခြင်းဖြစ်သည်။

ခဏအကြာတွင် ကောင်းကင်ထက်မှ အရာဝတ္ထုများ ကျရောက်လာခြင်း ရပ်ဆိုင်းသွားတော့သည်။ သို့သော်လည်း ထိုဒေသအတွက် ကျရောက်လာသော ကပ်ဆိုးသည်မပြီးဆုံးနိင်သေးပါ။ အရာဝတ္ထုများ ကျရောက်လာခြင်း ရပ်ဆိုင်းသွားပြီးနောက် ကောင်းကင်သည် ဟိုးယခင်ကအတိုင်း ပြန်လည်ဖုံးအုပ် သွားတော့သည်။ နောက်ထပ် မည်သည့်အရာမှ ကျမလာတော့ပေ။ သူတို့အရပ်ဒေသတစ်ခုလုံး အမျိုးအမည်မသိ အရာဝတ္ထုများဖြင့် ပြည့်နှက်ကာ လေထုသည်ပင် မလတ်ဆတ်တော့ဘဲ အသက်ရှူရသည်မှာ မွန်းကျပ်နေကြရသည်။

ထိုအရပ်ဒေသတစ်ခုလုံး မည်သည့်အသံမှ မကြားတော့ဘဲ တိတ်ဆိတ်သွားသဖြင့် အရာရာပြီးဆုံးသွားပြီဟု ထင်နေချိန်မှာပင် ဟိုးအဝေးအရပ်မှ တော်လဲသံကြီးများကို မောင်နီကြားလိုက်ရပြန်သည်။ ထို့နောက် သူတို့အရပ်ဒေသသို့ ဆူညံသံကြီးများ တဖြေးဖြေးနီးကပ်လာကာ ပြင်းထန်သော ငလျင်လှုပ်ခါမှုတို့ စတင်လာသည်။ တဖြည်းဖြည်းနှင့် တော်လဲသံများ နားကွဲမတတ် ဆူညံလာကာ ကမ္ဘာသည် အိုးထိန်းစက် ကဲ့သို့ ချာချာလည်တော့သည်။

“ အားးးး ”

“ကယ်ကြပါ ”

သွေးပျက်ခြောက်ခြားစွာ ထွက်ပေါ်လာသော အော်သံတို့သည်လည်း ဆူညံလွန်းသော တော်လဲ သံများအောက်တွင် နစ်မြုပ်နေလေသည်။ တစ်ဦးကိုတစ်ဦး အော်ခေါ်ကြသည်။ မိမိတို့ အားကိုးရာကို တိုင်တည်မြည်တမ်းကြသည်။ သို့သော် တစ်ဝေါဝေါ မြည်ဟီးနေသော တော်လဲသံများအောက်တွင် မိမိ အသံကိုပင် ပြန်ကြားဖို့ရန် မဖြစ်နိင်တော့ပေ။ လှုပ်ခါခြင်းတို့ တစ်စထက်တစ်စတိုး၍ ပြင်းထန်လာကာ သွက်သွက်ခါအောင် လည်ပတ်နေသဖြင့် ရပ်တည်ခြင်းငှာ မစွမ်းသာတော့ပေ။ သူတို့နေထိုင်ရာ အရပ်တွင် သေခြင်းတရားသည် နီးကပ်စွာ ရှိနေလေပြီ။

သူတို့နေထိုင်ရာကမ္ဘာသည် အိုးထိန်းစက်ကဲ့သို့ ချာချာလည်နေမှုကြောင့် သူတို့အရပ်မှ ဆွေမျိုးများ အဝေးကို လွင့်စင်ကုန်ကြတော့သည်။ မောင်နီသည် ရှင်သန်ခြင်းအတွက် ကုပ်ကပ်တွယ်ကပ်ထားသော သူ့လက်တို့ ညောင်းညာလွန်းလှပြီ။ ဒီပုံစံအတိုင်းဆိုလျှင် မကြာခင် တွယ်ကပ်ထားသော သူ့ခြေလက်တို့ပြုတ်ထွက်ကာ သူသည်လည်း လွင့်ထွက်သွားရတော့မည်။ နီးကပ်လွန်းသော သေခြင်းတရားကို သူမြင်လိုက်ရလေပြီ။ မောင်နီသည် အချိန်သိပ်မကြာခင်မှာပင် သူသေရတော့မည်မှန်း သိနေသည်။ သူချစ်သောမိသားစု ၊ သူနေထိုင်ရာအရပ် ၊ သူ့ဆွေမျိုးများ နှင့် သူနှစ်သက်သော အရာများအားလုံး ချန်ရစ်ခဲ့ရတော့မည်။

မောင်နီသည် ဝမ်းနည်းလွန်းသဖြင့် မျက်ရည်တို့ အဆက်မပြတ် တသွင်သွင် ကျဆင်းလာသည်။ သူတို့အတွက် ကပ်ဘေးကြီးက ဆိုးရွားလွန်းလှသည်။ တဝေါဝေါမြည်သံများ ကြားနေရသဖြင့် သွေးပျက်မတတ် ဖြစ်နေရသည်။ အပြောင်းအလဲများမှာ မြန်ဆန်လွန်းလှသည်။ မကြာသေးသည့် အချိန်က အေးချမ်းရှင်းလင်းနေသော သူတို့၏ အရပ်ဒေသသည် ယခုတော့ ကောင်းကင်မှကျလာသည့် အရာဝတ္ထုများဖြင့် တောင်ပုံရာပုံဖြစ်ကာ ပြည့်နှက်နေလေပြီ။ ထိုအရာများအောက်တွင်တော့ သူတို့၏ အိမ်နီးချင်းများ ဆွေမျိုးများ ပိပြားနေခဲ့ပြီ။ သူသည်လည်း ဘယ်အချိန်တွင် အသက်ထွက်ရတော့မလဲ စောင့်စားနေမိတော့သည်။

ထိုအချိန်တွင် ချာချာလည်မှုတို့ ရုတ်တရက် ရပ်တန့်သွားသည်။ တော်လဲသံများပါ ငြိမ်သက်သွားသဖြင့် သူထိတ်ခနဲ ဝမ်းသာသွား၏။ ရုတ်ခြည်းတိတ်ဆိတ်သွားပုံသည် အံ့သြဖွယ် ကောင်းလွန်းလှသည်။ ယခုကလေးတင် ထွက်ပေါ်ခဲ့သော တဝေါဝေါဖြင့် တော်လဲသံများလည်း မရှိတော့။ ဤနေရာတွင် မည်သည့်အဖြစ်အပျက်မှ မဖြစ်ခဲ့ဘူးသလို တိတ်ဆိတ်သွားခြင်းဖြစ်သည်။ ကပ်ဘေးကြီး ပြီးဆုံးသွားပြီထင်၍ မောင်နီပျော်ရွှင်သွားမိသည်။ ဒါဆို သူမသေနိင် တော့ဘူးပေါ့။ အို… ကံကောင်း လိုက်တာ ။ သေခြင်းတရားဆီမှ ကံသီကာ လွတ်မြောက်ခဲ့သဖြင့် သူစိတ်မထိန်းနိင်စွာ ခြေဦးတည့်ရာ ပြေးလွှားနေတော့သည်။

“ဟေးးး”

ဝမ်းသာလွန်းစွာ အားပါးတရ အော်လိုက်မိပြီးမှ သူ့ဆွေမျိုးများအတွက် သတိရမိသဖြင့် ချက်ချင်း အသံပြန်ပိတ်လိုက်ရ၏။ သူ့လိုခံစားရ၍ထင်သည် ဟိုနေရာ ဒီနေရာများမှ မသေဘဲ ကျန်ခဲ့သူတို့၏ ဝမ်းသာအားရ အော်သံများ ထွက်ပေါ်လာ၏။ ထို့အတူ နေရာအနှံ့အပြားမှ ငိုကြွေးသံများလည်း ထွက်ပေါ်နေသည်။ ခြေလက်ပိမိသူတို့၏ ညည်းညူသံများလည်း နေရာအနှံ့မှ ထွက်ပေါ်နေသည်။ ဘာပဲဖြစ်ဖြစ် ခုတော့ သူလွတ်မြောက်ခဲ့လေပြီ။ သူ့မိသားစုကိုတော့ လောလောလတ်လတ် ရှာဖွေ၍ မရနိင်သေးပေ။ နေရပ်တစ်ခုလုံး အခြေအနေများ ရှုပ်ထွေးနေသည်။

လောလောဆယ် ကယ်၍ရနိင်မည့်သူများကို ကယ်တင်ပေးရမည်ဟု မောင်နီတွေးမိသည်။ အနီးအနား ကြည့်မိချိန်တွင် ခြေလက်ပြတ်ပြီး လူးလိမ့်အော်ဟစ်နေသူတချို့ကို တွေ့လိုက်ရ၏။ သူကယ်တင်ပေးဖို့ရန် အနားသို့ တိုးကပ်သွားမိသည်။

ထိုအချိန်တွင် ဆိုးရွားလွန်းသော ကပ်ဘေးကြီး ဒုတိယအကြိမ် ကျရောက်လာပြန်တော့သည်။ ဤတစ်ကြိမ် တွင်တော့ မြင့်ရာအရပ်မှ ရေများ တဝေါဝေါဖြင့် စီးဆင်းလာခြင်းဖြစ်သည်။ ရေလုံးကြီးများ ဝင်ရောက်လာပုံမှာ မြန်ဆန်လွန်းလှသဖြင့် သူ့ဘေးဘက်ရှိ တောင်ပေါ်သို့ အလျင်အမြန် ပြေးတက်လိုက်ရသည်။ ရေများ အဆက်မပြတ် ဝင်ရောက်လာမှုကြောင့် ရေပြင်မှာ တဖြည်းဖြည်း မြင့်တက်လာသဖြင့် ပို၍မြင့်ရာဆီသို့ အတင်းကုပ်ကပ် တွယ်တက်နေမိသည်။ သေဘေးကြောင့် မရမက ကုပ်ကပ်တွယ်တက်မိသော်လည်း တက်ရသည်မှာ မက်စောက်လွန်းလှသည်။ နားခိုရာ နေရာတစ်ခုကို ရောက်သွားသဖြင့် ရေပြင်ကြီးကို ငုံ့ကြည့်လိုက်မိသည်။

ထိုရေများထဲတွင်တော့ သေဆုံးသွားသူတို့ ပေါလော မျောပါနေသည်ကို တွေ့လိုက်ရသဖြင့် သူ့ခြေလက်တို့ အားအင်ကုန်ခမ်းမတတ် ဖြစ်သွားရသည်။ ရေပြင်ကျယ်ကြီးထဲတွင် အစုအဝေးလိုက် သေဆုံးမျောပါနေသည်ကို မြင်လိုက်ရသဖြင့် ကြောက်ရွံ့ထိတ်လန့်လွန်းစွာ ရှိုက်ကြီးတစ်ငင် ငိုကြွေးနေမိသည်။ သူသည်လည်း မကြာခင် ထိုအစုအဝေးထဲတွင် ပါဝင်ရတော့မည်ထင်သည်။ အဆက်မပြတ် ဝင်ရောက်လာနေသော ရေလုံးကြီး များကြောင့် သူတို့နေထိုင်ခဲ့ရာ အရပ်တစ်ခုလုံး ရေမြုပ်သွားလေပြီ။ သူခိုကပ်နေသော နေရာဆီသို့ မကြာခင် ရေများရောက်လာတော့မည်ကို ခန့်မှန်းမိသဖြင့် သူ့ခန္ဓာကိုယ်တစ်ခုလုံး တဆတ်ဆတ် တုန်ယင်နေမိသည်။ ပြေးစရာနေရာ မရှိတော့မှန်း သူသိနေလေပြီ။

ဒီတစ်ကြိမ်တွင်တော့ သေခြင်းတရားထံမှ သူလွတ်မြောက်ဖို့ရန် မဖြစ်နိင်တော့ပေ။ သေချာနေသော သေခြင်းတရားကို ထိုင်စောင့်နေရသူ၏ ခံစားချက်သည် သွေးပျက်ဖွယ်ရာသာ ဖြစ်သည်။ ခြောက်ခြားတုန်လှုပ် ဖို့လည်း ကောင်းလှသည်။ အဆက်မပြတ် ဝင်ရောက်နေသည့် ရေများကြောင့် ရေပြင်မှာ တဖြည်းဖြည်းနှင့် ပို၍မြင့်တက်လာသည်မှာ သူခိုလုံရာ နေရာအထိပင် မကြာခင်ရောက်လာတော့မည်။ ပြေးပုန်းရန်နေရာ ရှိနိင်သေးမလားဆိုသည့် အတွေးဖြင့် အပေါ်သို့မော့ကြည့်မိသည်။ မတ်စောက်လွန်းလှသဖြင့် ထပ်တက်ဖို့ရန် မဖြစ်နိင်တော့။ သူ့တွင်လည်း ခွန်အား မကျန်တော့မှန်း မောင်နီသိနေသည်။

တစ်စထက်တစ်စ မြင့်တက်လာသော ရေများကို ကြည့်ရသည်မှာ သေမင်းသည် သူ့ခံတွင်းကို ဖွင့်ဟရင်း အနားသို့ တိုးကပ်လာသလို ခံစားလိုက်ရသည်။ အစွယ်ဖြူဖြူများကိုပင် မြင်လိုက်ရသလိုလိုပင် ….။ သူ့စိတ်တို့ ထိန်းမရတော့။ မောင်နီသည် အသံနက်ကြီးဖြင့်အော်မိသည်။ သူ့ခြေလက်တို့ တဆတ်ဆတ်တုန်နေသည်။ ရှင်သန်ဖို့ရန်အတွက် နောက်ဆုံးအနေဖြင့် အပေါ်ထပ်တက်ရန် နေရာရှာနေချိန်တွင် သူ့ခြေထောက် အေးခနဲ ဖြစ်သွားသဖြင့် ငုံ့ကြည့်လိုက်မိသည်။

အိုးးးး ရေတွေ

သေမင်း၏ လက်အေးကြီးဖြင့် သူ့ခြေထောက်ကို ဖမ်းဆုပ်ကိုင်ခံလိုက်ရသလို သူ့နှလုံးသား ထိတ်ခနဲဖြစ်ကာ အမြင်အာရုံများ ပြာထွက်သွားသည်။ သူသေရတော့မှာပါလား။ နောက်ဆုံးလက်ကျန် အင်အားကို ညစ်ထုတ်ကာ ကြောက်လန့်တစ်ကြား အပေါ်သို့ ထပ်မံကုတ်တက်ရန် ကြိုးစားနေချိန်မှာပင် သူ့ခန္ဓာကိုယ် တစ်ခုလုံး ရေထဲသို့မျောပါသွားတော့သည်။ သူ၏ထိတ်လန့်တကြား အော်သံသည်လည်း ဆူညံစွာ ဝင်ရောက်နေသော ရေလုံးကြီးမျာ၏ အသံအောက်တွင် နစ်မြုပ်သွားလေပြီ။

မကြာခင် ရေများစီးဝင်လာမှု ရပ်တန့်သွားသော်လည်း သူတို့အရပ်သည်ကား တစ်ခဏအတွင်းတွင် ပင်လယ်ပြင်ကြီး ဖြစ်သွားလေပြီ။ မှီတွယ်ရာ အရာဝတ္ထုတစ်ခုခုကို ဖမ်းကိုင်ဖို့ရန် ကြိုးစားသော်လည်း ပင်လယ်ပြင်ကြီးသဖွယ် ဖြစ်နေသော ရေပြင်ကျယ်ကြီးထဲတွင် သူ့ခန္ဓာကိုယ် သေးသေးလေးမှာ အဆီးအတားမရှိ မျောလွင့်နေလေသည်။ သူ့လိုပင် သေအံ့ဆဲဆဲ မှီတွယ်ရာ တစ်ခုခုကို ဖက်တွယ်ထားသော ဘဝတူများကိုလည်း ဖျတ်ခနဲ ဖျတ်ခနဲ တွေ့လိုက်ရသည်။

ထိုအချိန်တွင် တော်လဲသံများ နောက်တစ်ကြိမ် ထပ်မံကြားရကာ သူတို့နေထိုင်ရာ အရပ်သည် အိုးထိန်းစက်ကဲ့သို့ ချာချာလည်ပြန်လေသည်။ ရေများ ဘောင်ဘင်ခတ်နေသော လှိုင်းထန်လွန်းသည့် ပင်လယ်ပြင်ကျယ်ထဲတွင် သေဆုံးသွားသော သူ့ခန္ဓာနှင့် မျိုးနွယ်စုများအားလုံး မျောပါနေကြတော့သည်။ နောက်ဆုံးတွင် ဆိုးရွားလွန်းသော ကပ်ဘေးကြီးကြောင့် သူတို့အားလုံး သေဆုံးခဲ့လေပြီ။ အသက်ရှင် ကျန်ရစ်ခဲ့သူ ဆို၍ မည်သူမှ မရှိတော့ပေ။

***

အခန်း (၂)

ကျကျန်ရစ်သော အင်္ကျ ီတစ်ထည်ကို ထပ်ထည့်ရန် အဝတ်လျှော်စက် အဖုံးကို ဖွင့်လိုက်မိချိန် ရေထဲတွင် မျောပါနေသော ပုရွတ်ဆိတ်များကို တွေ့လိုက်ရ၏။ အဝတ်လျှော်ခါနီး စက်ထဲသို့ သေသေချာချာ မကြည့်မိလိုက်သဖြင့် အဝတ်လျှော်စက်ထဲတွင် သေဆုံးသွားသော ပုရွတ်ဆိတ်များဖြစ်မည်။ လွန်ခဲ့သည့် တစ်ပါတ်ခန့်က နောက်ဆုံးလျှော်ခဲ့ပြီးချိန်တွင် အံကျအောင် ပြန်မပိတ်ခဲ့မိသဖြင့် ဝင်နေသော ပုရွတ်ဆိတ်များ ဖြစ်ဟန်တူသည်။ ပုခုံးတစ်ချက်တွန့်ကာ အဖုံးကို ပြန်ပိတ်လိုက်၏။

အဝတ်လျှော်စက်သည်ကား တာဝန်ကျေစွာ လည်နေလေပြီ။

မြစ်ကျိုးအင်း


📝 သုံးသပ်ချက်များ။ ။ Lily ThanTin 彭霓霓

ဤစကားပြေကို သရုပ်ဖော်ရေးနည်း၊ ဖြစ်စဉ်ပြရေးနည်းတို့ဖြင့် ရေးသားထားခြင်းဖြစ်သည်။ စကားပြေ၏အစကို အနိဌာရုံများဖြင့် စဖွင့်ထားပြီး လူ့ပတ်ဝန်းကျင်တွင်ကြုံရလေ့ရှိသည့် သဘာဝဘေး အန္တရာယ်များက ဝတ္ထုတစ်ပုဒ်လုံးကို လွှမ်းမိုးစီးနင်းနေစေသည်။

မည်သည့်နေရာကလာမှန်းမသိဘဲ အဝတ်လျှော်စက်ထဲသို့ ရောက်နေသည့် ပုရွက်ဆိတ်မျိုး နွယ်စု၏ ကြမ္မာကို ခံစားတင်ပြထားသည်။ ရွှေ့ပြောင်းနေထိုင်သူ လူသားမျိုးနွယ်စုများ မည်သို့နေထိုင် ကြသည်၊ မည်သို့ကြုံတွေ့သည်ကို တိုက်ရိုက်တင်ပြခြင်းမျိုးမဟုတ်ဘဲ အလွန်အားနည်းသည့်တိရိစ္ဆာန် မျိုးနွယ်စုဖြစ်သည့် ပုရွက်ဆိတ်မျိုးနွယ်စု၏ ဖြတ်သန်းပုံနှင့်ခိုင်းနှိုင်း ဖွဲ့နွဲ့တင်ပြထားသည်။ ပုရွက်ဆိတ် များ ကမ္ဘာပျက်ခြင်းကို ကြုံတွေ့လိုက်ရခြင်းသည် ၎င်းတို့ထက် ဉာဏ်ပညာ၊ခွန်အားနှင့် အစစအရာရာ သာလွန်သည့် လူသားမျိုးနွယ်စုများကြောင့် ဖြစ်ကြောင်း အဆုံးသတ်တွင် ဖော်ပြထားသည်။

လူမျိုးနွယ်စုများအနေဖြင့်လည်း သဘာဝဘေးအန္တရာယ်ကြောင့် တစ်နယ်မှ တစ်နယ် ရွှေ့ပြောင်း နေထိုင်ခြင်းများကို လုပ်ဆောင်ခဲ့ရသည်များရှိပြီး အချို့မှာလည်း အဆိုပါ ရိုက်ခတ်မှုကြောင့် ဘဝတစ်ပါးသို့တိမ်းပါးကူးပြောင်းသွား သူများလည်း ရှိသည်။ အချို့ရွှေ့ပြောင်းမှုများသည် သဘာဝဘေးအန္တရာယ်ကြောင့်ဖြစ်သော်လည်း အချို့ ရွှေ့ပြောင်း နေထိုင်မှုများမှာမူ လူသားမျိုးနွယ်စုကိုယ်တိုင် ဖန်တီး၍ဖြစ်ပေါ်လာသည့် ပဋိပက္ခများကြောင့်ဖြစ်သည်။ မြန်မာနိုင်ငံသို့ ဝင်ရောက်တိုက်ခတ်ခဲ့သည့် နာဂစ်မုန်တိုင်းကြောင့် ဧရာ၀တီတိုင်းဒေသကြီးတွင် သေကြကျေကြသည့် လူဦးရေမနည်းပါ၊ အသက်ရှင်လျက်ကျန်ရစ်ခဲ့သည့် လူတို့သည်လည်း ဆားငန်ရေဝင်သည့် လယ်ဧကများနှင့် အိုးအိမ်အပျက်အစီးများကြောင့် လုပ်ကိုင်စားသောက်၍ မရဘဲ အခြားနယ်များသို့ ပြောင်းရွှေ့လုပ်ကိုင်စားသောက်ကြသည့် ဖြစ်စဉ်များလည်း ရှိခဲ့သည်။ စစ်မက်ဖြစ်ပွား ခြင်းကြောင့် စစ်ဘေးရှောင်နေကြရသော၊ စစ်ဘေးရှောင်ရင်းနှင့်ပင် စစ်ဘေးသင့်၍သေဆုံးခဲ့ရသော လူမျိုးနွယ်စုများသည်လည်း မြန်မာနိုင်ငံတွင် ထုနှင့်ဒေးရှိနေသည်။ “ကမ္ဘာပျက်ခြင်း” စကားပြေသည် ရွှေ့ပြောင်းနိုင်ငံသား၊ရွှေ့ပြောင်းလုပ်သားများ၏ ပုံရိပ်ကိုသာမက ရွှေ့ပြောင်းနေထိုင်သည့်မည်သည့်မျိုး နွယ်စု၏ကံကြမ္မာကိုမဆို အတိုင်းထက် အလွန်ထင်ဟပ်စေသော စကားပြေကောင်း တစ်ပုဒ်ဖြစ်ပါသည်။